التجربة المصرية بين الهرى والحقيقة

الحرقان و الهرى شغال من الامس على أشده …. الغل و الحقد و الحسره على نجاح مصر المدوى في خلق منظومة علاجيه و تجربة مصريه ناجحه لا نظير لها على مستوى العالم أخرج ما في داخل النفوس المريضه و اللى كانت تتمنى ان تتحقق مقولتهم الشهيره ” يا رب تولع و يجيب عاليها واطيها ” .
و لانهم عايزين بالبلدى كده يلغوشوا على النجاح المصرى و اللى دول العالم اجمع بتحسد مصر عليه و ممكن مفيش اي دولة تانيه متقدمه بكل امكانياتها الاقتصاديه انها تحققه …. و زي ما لغوشوا على التجربه المصريه الرائده في محاربة العشوائيات و سابوا كل حاجه و مسكوا في السجاده الحمراء …. قعدوا عوجيز الفرح يمصمصوا شفايفهم و يقولوا …. ايه اللى جاب اليهودي هنا …. شوفت الموكب الامني قد ايه ….. بقي يكرموا اليهودي و يسيبوا امير القلوب … و تكلفة الحفله كام …. و ايه لزمة البهرجة دي …. اي الفشل الامني ده … روحوا شوفوا جهاز الكفته فين …. و دول بالذات نحب نقولهم ( ابقي تعالي و انا اقولك فين )
.
و عشان نختصر الموضوع ….. و نسيبنا من الواغش اللى بيتكلموا …. تعالوا نتكلم في المفيد :-
.
• منظمة الصحه العالميه اعلنت عن علاج 150 الف مريض من فيرس سي في العام الماضي في 195 دولة على مستوى العالم اجمع …. في حين تكلمت بإنبهار و تعجب عن نجاح مصر في علاج ما يقرب من مليون مريض في نفس العام ( ايوه مليون) … لاول مره في التاريخ … و بالمجاااااان 🙂 🙂 … و الاعلان عن مصر هي الدوله الوحيده في العالم التى تقضي على قوائم الانتظار … و تطالب بدراسه التجربه المصريه و امكانية تكرارها في دول اخرى .
.
• و لان قوائم الانتظار انتهت تماما … توجهت وزارة الصحه الى توجيه قوافل الى المدن و القرى و النجوع لعمل التحاليل و البحث عن المرضي في كل مكان في مصر … و الاعلان عن مصر خاليه تماما من فيرس سي في 2020 … يعني كمان 3 سنوات بالكتير … يعني الى كل واحد نزل و طالب بسقوط البلد و كان انتشار فيرس سي من احد اهم اسبابه … نحب نقوله … مصر نجحت فى تحويل مشكلة و مثال للفشل … الى اعظم منظومة نجاح طبي في القرن الواحد والعشرين …. و مصر لها تجارب رائد تدّرس حتي الان في كل العالم على كيفية القضاء على الامراض المستوطنه بالمجان … زي شلل الاطفال و البلهاريسيا … و انضم الى القائمة الان فيرس سي .
.
• مصر بقي و بعد ما ريقها نشف مع الشركات صاحبة حقوق عقارات علاج فيرس سي … الا انها كانت بتقابل بتعنت و تجاهل تااااام من كل الشركات مع انهم دعموا دول زي الهند مثلا في الموضوع ده … و كأن كان فيه لوبي عالمى على مصر عشان يفضل المرض الملعون ده مستوطن عندنا بينهش في لحم المصريين … لغاية اعلان الجيش عن جهاز الكفته اللى عواجيز الفرح قعدوا يتريقوا عليه …. قوم ايه بقي يا مؤمن …. في نفس الاسبوع … تقوم الشركه المصنعه لعقار السوفالدي تعرض على مصر انها تورده لمصر بـ 900 دولار فقط …. و في تحرك مفاجىء تماما …. تقوم تدي ترخيص لشركه مصريه لتصنيعه محليا لتنخفض تكلفة العقار الى اقل من 750 جنيه فقط … بس طبعا جهاز الكفته مش حقيقي و هجص 🙂 🙂
.
• نيجي بقي للحاج ميسي 🙂 🙂 …. و في الاول نحب نقول ليتامى الباندا … ان اي لاعب مصري سابق … محدش يعرفة لا في اوروبا و لا بقيت دول العالم …. اما ميسي … فالاكونت بتاعه بيشوفه 80 مليون بني آدم … دة غير الميديا العالميه في كل دول العالم اللى بيشوفها مليارات في كل الكره الارضيه اللى غطت الخبر و اعلنت عن السبب الحقيقي للزياره .
.
• شوف يا سيدي … عشان تبقي عارف … تمن كورس العلاج بالسوفالدي في اسبانيا يتخطي 60 الف يورو … و انجلترا حوالي 70 الف جنيه استرليني … و امريكا يبدأ من 80 الف دولار … و الخليج في حدود 240 الف ريال … و الدواء ده مش متغطي بالتأمين الصحي غير بعدد محدود جدا سنويا … يعني عشان تتعالج على حساب الدوله اللى هي غنيه و متقدمه جدا … ممكن دورك يجي بعد 10 سنين على الاقل … يعني يكون المريض مات اصلا … و اللى مش قادر يستني … يبقي يدفع التكلفه الغاليه دي 🙂
.
• طب ميسي كان جاي يعمل ايه …. اقولك انا …. فيه لجنه مشكلة من وزارة الصحه و السياحه و الجيش …. كانت شغاله من اكتر من سنه و لترتيب ان مصر بعد ما كانت اكبر دولة مستوطن فيها الفيرس اللعين … لم تكتفي باعلان مصر خاليه من الفيرس اللعين في 2020 … لكن انها تكون الوجهه الاولي للعلاج من الفيرس ده على مستوى العالم 🙂
.
• القصه حتكون كالاتي …. اي مواطن غير مصري يتفضل يحجز في البرنامج ده …. يدفع 5000 يورو … و يجي كسائح …. يقعد اسبوع معزز مكرم …. و نفرجه على الهرم و نركبه الجمل و نزوره المزارات السياحيه في القاهره … و نعالجه من الفيرس ….. يعني السعر شامل العلاج و اسبوع سياحه 🙂 🙂
.
• البرنامج ده اعلن تدشينه بالامس الحاج ميسي و اللى شافه العالم كله … و اللى الاعلان بتاعه ده بيتذاع في كل القنوات الاجنبيه …. و اللى كل المرضي على مستوى العالم و اللى العلاج بالنسبه ليهم كان مسأله ميئوس منها … اصبح عندهم فرصه و بمبلغ زهيد جدا بالنسبه ليهم …. و بالنسبه لمصر …. السائح اللى حيصرف 5000 يورو في اسبوع حيكون مكسب هام جدا لمصر سواء في السياحه و تشغيل المنظومة السياحيه او في الدخل الكبير اللى حيكون بالعمله الصعبه … و الاهم … ان النوع ده من السياحه لا بيتأثر بارهاب و لا حتي بحرب اهليه …. لان اللى جاي يتعالج كان ميت اصلا … يعني مينفعش تتضرب زي ما ضربوا لينا السياحه الترفيهيه و الثقافيه 🙂 🙂 و اللى يقدر لها مع نموها ان العلاج ممكن يغطي ملايين في السنه
.
• و البدايه كانت بالامس …. مؤسسة الحاج ميسي الخيريه تبرعت بحوالي 6 مليون يويو لعلاج اول 1200 مريض من الارجنتين …. بلد ميسي …. يعني هو جه يخدم اهل بلده … و البقيه تأتي … لان صدى الاعلان امبارح عن بداية اتاحة العلاج للاجانب في مصر … وصل صداها لكل دول العالم … و الـ 170 مليون مريض في كل دول العالم وصلهم الخبر … و قدامه الاختيار … يا يستني دورة كمان 10 سنين عشان يتعالج في بلده … يا يدفع 80 الف دولار …. يا اما يدفع 5 الاف يورو فقط و يجي يتعالج و يتفسح و ينبسط كمان 🙂
.
من الاخر …. اللى حصل امبارح ده فخر لكل مصرى … و اعلان لنجاح مصر للقضاء على احد اهم المشاكل اللى كانت بتمس المواطن المصري في بيته …. مش بس كده …. ده الدوله المصريه حولت المشكله دي الى مصدر دخل و الوصول الى المواطن الاجنبي ايا كان مكانه او بلده ليكون دعاية اعلاميه ايجابيه عن مصر مجانيه.