ريم طارق: حسن شاكوش خدعني وفضحني وشهر بيا

قالت ريم طارق طليقة حسن شاكوش، إنها لم تعتذر له في الفيديو الذي نشره حسن لها على حسابه بفيس بوك، مشيرة إلى أن حسن عثر على الفيديو من الأشخاص الذين توسطوا لحل الخلاف بينهما ونشر الفيديو على حسابه دون أن يعيد لها حقوقها القانونية وأخل باتفاقه.

وقالت ريم طارق في لقاء تلفزيوني: محتاجة أن كل شخص يضيع من وقته 30 ثانية ويتفرح على الفيديو بتاعي اللي بيقول فيه أني اعتذرت له، وأني شفت منه كل خير، أنا ما اعتذرتش ولكن عملت الفيديو علشان آخد هدومي وأبين للناس أني صادقة، غير كده لأ.

فضحني وشهر بيا وقال لي أني عندي أمراض
وأضافت ريم طارق باكية: حسن شاكوش خدعني وفضحني وشهر بيا وقال لي أني عندي أمراض واتكلم عني وداس على كرامتي بالجزمة قصاد فيديو علشان يبين اني بعتذر، ولكن أنا ما اعتذرتش ليه عن أي حاجة.

وتابعت ريم طارق: اعتذرت في الفيديو لوالدي ووالدتي ومامته لأنها ست كبيرة ولها كل الاحترام والتقدير، وبقول لها طلعي نفسك بره الموضوع، وبقول لأهالينا يطلعوا نفسهم برة الموضوع لأنه مش مصدر ثقة وخدعني بدال المرة تلات مرات وأنا هاخد حقي بالقانوان وراضية بيه، وما تستكتروش عليا حقي.

عملت الفيديو من ورا أهلي
واستكملت ريم طارق: عملت الفيديو من ورا أهلي وما كانوش معايا في اليوم ده، وما كانوش موافقين وما زالوا مش موافقين، ما اعرفش انهم هيدولوا الفيديو ده مش مصدر ثقة لأي حد، خدعني 3 مرات، ومش عارفة هو عاوز إيه من الحرب دي.. هل هو مبسوط من السلطة والنفوذ والسوشيال ميديا هو مش بيفكر في ربنا وأن ده حق ولية ومش بيفكر أنه عنده أخوات.

وأردفت: ليه تتكلم على واحدة وتعيب فيها.. أنت مش عاوز تتجوزها من رابع يوم ومدبر ليا المكيدة من أول يوم جواز وعامل في قسيمة الجواز بكر رشيد علشان يوم ما اتكلم تحبسني.. ليه أنا عملت إيه، وإيه اللي بيني وبينك.. وأنت مش مصدر ثقة وحقي هاخده بالقانون ولو ما خدتهوش عند ربنا.

وواصلت: أنا عندي قضية نفقة وعندي قضية القايمة، وفيه قضية تانية هاخد إجراء فيها من بكرة مش هتكلم عنها وربنا يقدرني والحاجة اللي معايا أعرف أجيب بيها حقي وأنا واثقة في ربنا وواثقة في قانون بلدنا، ولازم الظاهرة أو الشخصيات اللي بتضحك على البنات ينقرضوا وكفاية ضحك على البنات ورميهم في الشارع.

وسبق أن نشر كل من حسن شاكوش وريم طارق فيديو يعلنان فيه انتهاء الخلافات بينهما، إلا أن ريم أكدت أن هناك وسطاء تدخلوا لحل الخلاف يبنهما بشرط أن يعيد لها حقوقها القانونية وملابسها، مشيرة إلى أنها أرسلت فيديو تكشف فيه أنها حصلت على حقوقها كدليل قبل أن تحصل على حقوقها وبعد استعادة أشيائها الخاصة من الفيلا تفاجأت بأن حسن نشر الفيديو ولم يعطها حقوقها القانونية وهي عبارة عن المؤخر والنفقة والشبكة.