ياسمين صبري تحكي عن سحر شخصيتها في برنامج الحكاية مع عمرو أديب

حلت الفنانة ياسمين صبري، ضيفة في برنامج الحكاية المذاع عبر شاشة قناة MBC مصر، والذي يقدمه الإعلامي عمرو أديب، وأكدت أنها شخصية يقع الجميع في حبها، مشيرة إلى أنها سيدة محافظة.

وقالت ياسمين صبري: مش كل الناس بتقدر تيجي تكلمني، بيقولوا مش قدها وبيخافوا وبيقولوا أنا هعمل لها أيه وهقدم لها أيه، وبيبدأ يتهز، وأنا أسفة أني بقول كدا، بس كل ست عارفة إمكانية تأثيرها، لو ثعبان جاي يخططلي هيقع في شره وهيحبني، ومش بقول كدا عشان الشكل، ولكن بقول كدا عشان أنا بنت بلد وهادية مش سبور.

وأشارت ياسمين صبري إلى أنها من السيدات المحافظة، ولافتت إلى أن هذا النوع من السيدات يتقل بمرور الأيام، وعن أصدقاء الرجال، أوضحت: معنديش أصدقاء رجالة أخاف الموضوع يقلب مشاعر، ومش حاسه أني عايزه حاجه.

وتطرقت ياسمين صبري للحديث عن كيفية التفرقة بين الرجل الصادق في مشاعره، والغير صادق، قائلة:لو حب الشئ اللي بره يبقى حب اللي جوه، الشئ اللي بيلمع بيجذب ناس كتيرة أوي، ولكن الشعور هو اللي يأكد الشعور ده حقيقي ولا لا، كل ست جواها سنسور، وبتكون عارفة الحقيقة، هل الراجل ده منبهر بيها من بره بس ولا أيه.

ياسمين صبري: أنا بحب الستات أوي وبحب أقولهم إنهم حلوين

وأردفت ياسمين صبري: أنا بحب الستات أوي وبقدرهم ولما الست بتتكلم معايا على طول أشكر فيها وأقولها انتي قمر وريحتك حلوة، وتستغرب تقولي أنا؟، ومش بسكت وبفضل أؤكد على معلومة إن الست حلوة، ودي صدقة أصلا وجبر خواطر وهترجع وتقعدلك في رزق وجمال وسعادة.. دي فلسفتي.